മാനുഷ്യകം
=========
ഈസോപ്പു പറഞ്ഞു
മിക്കവാറും ഞാന്‍
രണ്ടുകൂട്ടുകാരെപ്പറ്റിയാണ് കഥ പറയാറ്.
അവര്‍ മിക്കവാറും തന്നെ
വിരുദ്ധോക്തികളുടെ
പ്രയോക്താക്കളായിരിക്കും.
എങ്കിലുമവര്‍
ഒരേ കാട്ടിലോ
ഒരേയൊരേ നാട്ടുക്കൂട്ടത്തിലോ
ഒരേ പുഴയുടെ തീരത്തോ
ഒരേ പാറക്കെട്ടിനിരുപുറമോ
താമസിക്കുന്നവരായിരിക്കും.
എപ്പോഴുമല്ലെങ്കിലും
മിക്കവാറും
അങ്ങനെതന്നെയായിരിക്കും.
ഒരേപോലവര്‍ മാനത്തേക്കു നോക്കും.
മിക്കവാറുംതന്നെ വിരുദ്ധകാഴ്ചകളായിരിക്കും
എന്നാല്‍ കാണുക..
രണ്ട് യുക്തികളിലൂടെ
സഞ്ചരിച്ച്
അവര്‍ മാനത്തെ രണ്ടായി മുറിക്കും,
എപ്പോഴുമില്ലെങ്കിലും
മിക്കവാറും തന്നെ
മാനത്തിന്റെ രണ്ടുകോണുകളില്‍ ചെന്ന്
തലകുത്തി ഞാന്നുകിടന്ന്
ലോകത്തെ നോക്കി ചിരിക്കും.
ഗാന്ധീ..
ഈസോപ്പ് വിളിച്ചു.
സന്മാര്‍ഗോത്പ്രേരകകഥകള് പറഞ്ഞുപറഞ്ഞ്
സത്യാന്വേഷണപരീക്ഷണങ്ങളിലേക്കു
ഞാനെന്നെ ആഴ്ചകളായി
പറിച്ചുനട്ടിരിക്കുകയായിരുന്നു..
തലകുത്തി ഞാന്നുകിടന്ന്
ആദ്യമായി ഞാന്‍ ലോകത്തെ നോക്കുകയായിരുന്നു...
ഹാ!
എന്റെ *ആട്ടിന്‍കുട്ടിയും ചെന്നായും
എലിയും കോഴിയും
അലക്കുകാരനും കൊല്ലനും
ആ കോവര്‍ക്കഴുതയും പുല്‍ച്ചാടികളും
നിരനിരന്ന്
നിന്റെ പരീക്ഷണങ്ങളിലൂടെ,
സത്യവഴികളിലൂടെ
അടിവച്ചടിവച്ച് സഞ്ചരിക്കുകയായിരുന്നു.
അപ്പോഴാണ്..
എപ്പോഴുമില്ലെന്നല്ല
ഒരിക്കലുമില്ലാത്തപോലെ
എന്റെ '**ദൈവവും വണ്ടിക്കാരനും'
ഫേബിള്‍ചുമരുകളിലൂടെ
നിരങ്ങിയിറങ്ങി
നിന്റെ പരീക്ഷണവണ്ടിയിലേക്ക് ചാടിക്കയറി!
ഇതെന്താണ്!!
കടിഞ്ഞാണ്‍ പിടിച്ചുവാങ്ങി
ദൈവം കുതിരകളെ പായിക്കുന്നു!!..
വണ്ടിക്കാരനൊരാശ്വാസമായി.
കൗതുകത്തോടെ അയാള്‍ വണ്ടിയില്‍
ചാരിയിരുന്നു.
നീ ,സാകൂതം പുഞ്ചിരിപൊഴിച്ചുകൊണ്ടേയിരുന്നു !
*[ആട്ടിന്‍ കുട്ടിയും ചെന്നായും,എലിയും കോഴിയും,അലക്കു..... വിവിധ ഈസോപ്പ് കഥകള്‍]
**ഒരു ഈസോപ്പ് കഥ
No comments:
Post a Comment