നോട്ടം

=====

ആദ്യമായി കാണുന്ന ഒരാളെ

ചുഴിഞ്ഞുനോക്കി

അയാളില്‍ നിങ്ങളെത്തന്നെ തേടുന്നത്

ശരിയായൊരു കാര്യമാണോ?അറിയില്ല.

തീര്‍ച്ചയായും നോട്ടമേല്‍ക്കുന്നയാള്‍

ഇതെന്തു പരവേശനോട്ടം

എന്നന്ധാളിച്ചേക്കാം.

കണ്ണിന്റെ സ്ഖലനോത്സുകതയെപ്പറ്റി

തൊട്ടടുത്തുനില്‍ക്കുന്നയാളോട്

അടക്കം പറഞ്ഞേക്കാം..

നിങ്ങളാ കുഞ്ഞുപൂച്ചക്കുട്ടിയെ തപ്പുകയാണെന്ന് അയാള്‍ക്ക് അറിയില്ലല്ലോ.

എപ്പഴോ ഒരു മണ്‍സൂണ്‍മഴയത്ത്

ഒരുപിടി ചോറും തിന്ന് ഇറങ്ങിപ്പോയതാണ്.

തീവ്രനോട്ടങ്ങള്‍ ചിലരെ പ്രക്ഷുബ്ധരാക്കും

നിങ്ങളൊരു കവയിത്രിയോ ഇല്ലുസ്ട്രേറ്ററോ

ഫോട്ടോഗ്രാഫറോ ആണെന്നും

നിങ്ങളുടെ ഒരു കലാസൃഷ്ടിക്കായുള്ള ഫ്രെയിമൊരുക്കലാണ് ഈ നോട്ടമെന്നും

നുണപറഞ്ഞ് അയാളെ തെറ്റിദ്ധരിപ്പിച്ചോളൂ,

പാവം,ഫ്രോയിഡിനെയൊന്നും വായിച്ചിട്ടില്ലെങ്കില്‍

അയാളതില്‍ വീണുപോകും.

നിങ്ങളുടെ കാല്പനികനേത്രങ്ങളില്‍നിന്ന്

വനജ്യോത്സ്നയും മഞ്ഞുപാളികളും

ബഹുവര്‍ണച്ചിറകുള്ള കാക്കകളും

പ്രപഞ്ചത്തോടത്രയും ഉദാരതയോടെ

പുറത്തേയ്ക്ക് നൂണ്ടിറങ്ങി ഒരു ദൃശ്യമാകുന്നത്

അയാള്‍ വിസ്മയത്തോടെ നോക്കിനില്‍ക്കും.

ആ പൂച്ചക്കുട്ടി പണ്ടേ ഒരു ചാട്ടക്കാരനാണ്.

നിങ്ങള്‍ അതിനെ പിരിഞ്ഞു പരീക്ഷീണയായ

ഒരു യജമാനത്തിയും.

അതിന്റെ പിങ്ക്നിറമുള്ള മോണകളും 

ഈര്‍പ്പമുള്ള മൂക്കും പലവുരുസ്വപ്നം കണ്ട്

ഉറക്കത്തില്‍ നിങ്ങള്‍ വിമ്മിക്കരഞ്ഞിട്ടുണ്ട്.

യോസേ..ഫ്..നിങ്ങള്‍ അലറിവിളിച്ചിട്ടുണ്ട്..

ഒരിക്കല്‍ ഇരയുമായി വലിയ ഗര്‍വ്വോടെവന്ന

യോസഫ്പൂച്ചയെ നിങ്ങള്‍ അവഗണിച്ചു.

അതാണ് പറ്റിപ്പോയതെന്നു തോന്നുന്നു.

ഗര്‍വ്വഭംഗം ഒരു പൂച്ചപോലും സഹിക്കില്ല.

അന്നൊരിക്കല്‍ മട്ടുപ്പാവില്‍ മുടിയഴിച്ചിട്ടുനിന്ന്

മഴനനഞ്ഞുനിന്നുകൊണ്ടുള്ള നിങ്ങളുടെ

ഗിരിപ്രഭാഷണവും അവനെ മടുപ്പിച്ചുകാണും.

പിടയുന്നനോട്ടമുണ്ടെന്നൊന്നും പറഞ്ഞിട്ട് കാര്യമില്ല.

നോട്ടംകൊണ്ട് ഹൃദയത്തിലാക്കാന്‍ കഴിയണം.